ИИВ ходимлари томонидан махсус воситаларни қўллаш тартиби мавжуд

 

“Ички ишлар органлари тўғрисида”ги Қонунга мувофиқ, ички ишлар органи ходими фақат қонунда назарда тутилган ҳолларда ва тартибда ўқотар қурол ва махсус воситаларни олиб юриш, сақлаш, уларни қўллаш ва жисмоний куч ишлатиш ҳуқуқига эга.

 

Ҳужжатнинг 23-моддасида ички ишлар органи ходими томонидан махсус воситалардан қандай ҳолларда фойдаланиш мумкинлиги ёзиб қўйилган. Жумладан:

👉 фуқарога ёки ички ишлар органи ходимига қилинган ҳужумни қайтариш;

👉 жиноятга ёки маъмурий ҳуқуқбузарликка чек қўйиш;

👉 ички ишлар органи ходимига қаршилик кўрсатилишига чек қўйиш;

👉 жиноятни содир этиш чоғида ёки уни содир этганидан кейин дарҳол кўриб қолинган, яширинишга уринаётган шахсни ушлаш;

👉 қуролли қаршилик кўрсатиши мумкин бўлган шахсни ушлаш;

👉 ушлаб турилган шахсларни ва қамоққа олинган, маъмурий қамоққа олинган шахсларни олиб бориш, қўриқлаб бориш ва қўриқлашда, шунингдек қочишга уринишини, атрофдагиларга ёки ўзига зарар етказишини бартараф этиш;

👉 зўравонлик билан ушлаб турилган шахсларни, эгаллаб олинган биноларни, хоналарни, иншоотларни, транспорт воситаларини ва ер участкаларини озод қилиш;

👉 фуқароларнинг ҳаёти ва соғлиғига, жамоат хавфсизлигига таҳдид солувчи оммавий тартибсизликларга ҳамда бошқа ғайриқонуний хатти-ҳаракатларга чек қўйиш;

👉 ҳайдовчиси ички ишлар органи ходимининг тўхташ тўғрисидаги талабини бажармаган транспорт воситасини тўхтатиш;

👉 жиноятлар ёки маъмурий ҳуқуқбузарликлар содир этаётган ёхуд содир этган шахсларни аниқлаш;

👉 муҳофаза қилинадиган объектларни ҳимоя қилишда, ғайриқонуний хатти-ҳаракатларни содир этаётган фуқаролар гуруҳларининг ҳаракатланишини тўсиб қўйиш.

 

Мазкур модданинг иккинчи қисмига асосан 1–5, 7, 8 ва 11-асосларда кўрсатиб ўтилган ҳоллар вужудга келганда ички ишлар органлари ходимлари резина таёқлардан фойдаланиши мумкин.

 

8 ва 9-асосларда кўрсатиб ўтилган ҳолларда эса транспорт воситаларини мажбурий тўхтатиш воситаларини қўллаш ммумкин.

 

Агар жисмоний куч ишлатиш, махсус воситаларни ёки ўқотар қуролни қўллаш қонунда белгиланган асослар бўйича ва тартибда амалга оширилган бўлса, ички ишлар органи ходими жисмоний куч ишлатиш, махсус воситаларни ёки ўқотар қуролни қўллаш чоғида жисмоний ва юридик шахсларга етказилган зарар учун жавобгар бўлмайди.

“Ички ишлар органлари тўғрисида”ги Қонун.  21-модда.

 

Юридик ва жисмоний шахслар фақатгина қонунчилик ҳужжатларига риоя этган ҳолда иш кўриши лозим.

Аввалроқ Тошкентда “Лаcетти” ҳайдовчиси ЙПХ ходимига бўйсунмасдан қочиб кетгани ҳамда Ички ишлар ходимларига электрошокдан фойдаланишга рухсат берилгани ҳақида хабар берилганди.

 

Оламгир Абдиев