“Ногиронлиги бўлган инсонлар – жамиятнинг тўлақонли аъзолари” – Шавкат Мирзиёев

 

Бугун Президент Шавкат Мирзиёев "3 декабрь – Халқаро ногиронлар куни" муносабати билан Ўзбекистон халқига мурожаат йўллади. Бу ҳақда Президент матбуот хизмати хабар берди.

 

Мурожаат аввалида давлат раҳбари Ўзбекистон халқига ўзининг самимий тилакларини баён қилиб, имконияти чекланган фуқаролар учун зарур барча шароитларни яратиш давлат сиёсати даражасига кўтарилганини, бунинг тасдиғи ўлароқ мамлакатимизда “Ногиронлиги бўлган шахсларнинг ҳуқуқларини ҳимоя қилиш тўғрисида”ги Қонуннинг қабул қилинганини алоҳида таъкидлаб, бу борада амалга оширилган ишларга тўхталиб ўтган:

 

“Имконияти чекланган фуқаролар учун яратилаётган шароитлар ҳақида гапирганда, сўнгги икки йилда пенсия ва нафақа олувчи ногиронлиги бўлган шахслар сони 100 минг нафарга кўпайиб, уларнинг миқдори қарийб 2 баробарга оширилганини таъкидлаш лозим. Шунингдек, барча ҳудудларда “Саховат ва кўмак” умуммиллий ҳаракати доирасида ҳамда “темир дафтар”, “аёллар дафтари” ва “ёшлар дафтари”га киритилган имконияти чекланган юртдошларимизга манзилли ижтимоий ёрдам кўрсатиш тизими йўлга қўйилди”.

 

Шунингдек, мурожаатномада ногиронлиги бўлган шахсларга қўшимча шарт-шароитларни яратишга қаратилган алоҳида дастур қабул қилиниши баён этилган:

 

“Ушбу дастурнинг мазмун-моҳияти Бирлашган Миллатлар Ташкилотининг Барқарор ривожланиш мақсадлари билан ҳамоҳанг бўлиб, унда ногиронликни белгилашда тиббий ёндашувдан ижтимоий ёндашувга ўтиш асосий вазифа сифатида белгиланади”.

 

Қайд этилишича, энди ногиронлиги бўлган шахслар – “муаммоси бор инсонлар” деган қарашдан воз кечилиб, уларнинг имкониятини кенгайтириш учун, аввало, ижтимоий-иқтисодий тизимни такомиллаштириш кераклиги ва қуйидаги масалаларга эътибор қаратиш лозимлиги айтиб ўтилган:

 

"Биринчидан, ногиронлиги бўлган ёшларга барча даражада сифатли таълим олиши учун тенг имкониятлар яратилади.

 

Иккинчидан, ногиронлиги бўлган шахсларни касб-ҳунарга ўқитиш ва улар учун муносиб иш ўринларини яратиш орқали уларнинг даромадини кўпайтиришга қаратилган чора-тадбирлар янада кучайтирилади. Бу борада уларни замонавий касб-ҳунарга ўқитиш бўйича махсус дастурлар ишлаб чиқилади.

 

Учинчидан, ногиронлиги бўлган шахсларнинг саломатлигини асраш, уларга тиббий хизматлар кўрсатиш ишлари тизимли равишда давом эттирилади.

 

Тўртинчидан, имконияти чекланган фуқаролар мамлакатимизнинг ижтимоий, иқтисодий ва сиёсий ҳаётида фаол қатнашиши учун “тўсиқсиз муҳит”, яъни, қулай шароит яратилади".

 

Жавоҳирбек Турсунов