Малида автобус жангарилар ҳужумига учради
31 киши отиб ўлдирилган, бир неча киши яраланди.
Малида қуролланган шахслар маҳаллий бозорга одамларни олиб кетаётган автобусга ҳужум қилиб одамларни ўққа тутди. Натижада 31 киши ҳалок бўлган. Бу ҳақда Реутерс агентлиги хабар берди. Шунингдек, яна бир меча киши яраланган, бедарак йўқолганлар ҳам бор. Автобус Сонго қишлоғидан 10 километр узоқликдаги Бандиагара бозорига ҳаракатланаётганда ҳужумга учраган.
Қўшни Банкасс шаҳри мери Моулай Гуиндонинг сўзларига кўра, қуролланган одамлар “машинага қарата ўқ узган, шиналарини кесиб, одамларга қарата ўқ узган”.
Ҳозирча ҳеч бир террорчилик ташкилоти мазкур хунрезлик учун жавобгарликни ўз зиммасига олганича йўқ.
Аввалроқ Малида террорчилар ҳарбийларга ҳужум қилгани маълум қилинганди - камида беш киши ҳалок бўлган, яна саккиз киши яраланган. Шунингдек, Нигерияда қуролланган шахслар мактаб-интернатга ҳужум қилиб ўқучиларни ўғирлаб кетгани ҳам хабар қилинган эди.
Насиба Тўхтаева
