"Омикрон" пандемияни тугатиши мумкин – вирусолог
“Коронавирусдан ўлим ҳолатлари сони гриппнинг ўлим ҳолатлари сонига тенглашганда – пандемия тугагани ҳақида хулоса қилиш мумкин”.
Коронавируснинг янги “Омикрон” штамми пандемияни тугатиши мумкин, – деди Гамалея номидаги Иммунология маркази вирусологи Анатолий Альтштейн
Профессорнинг сўзларига кўра, Омикрон-штамм аниқланганига яқинда бир ой бўлади, лекин ўтган вақт ичида Омикрон-штамми юққан беморларнинг бирортасида касаллик оғир кечгани ёки ўлим ҳолатлари бўлгани кузатилмаган. Лекин шу билан бирга ушбу штамм ўта юқумлилиги аниқланган.
“Омикрон одамларга юқади, биз енгил кўринишдаги касалларни кўрамиз ва шундан сўнг ҳеч қандай коронавирус бизга хавфли бўлмайди”, – дейди вирусолог.
Ўта юқумлилик - янги вирус хусусиятларидан бири. Бу янги вируснинг S-оқсилида мутациялар жуда кўплиги билан изоҳланади. Яъни вируснинг геноми барқарор бўлмаса, касаллик оғир оқибатларга олиб келмайди.
Эслатиб ўтамиз, коронавируснинг янги B.1.1.529 штамми илк бор Ботсванада 11 ноябр куни аниқланган эди. Бугунги кунда Омикрон 27 та давлат ҳудудида аниқланган.
Жавоҳирбек Турсунов
