Президент Шавкат Мирзиёев давлат ташрифи билан Қозоғистонга боради

 

Ўзбекистон Республикаси Президенти Шавкат Мирзиёев Қозоғистон Республикаси Президенти Қасим-Жомарт Тоқаевнинг таклифига биноан 5-6 декабрь кунлари давлат ташрифи билан Қозоғистонда бўлади. Бу ҳақида Ўзбекистон Республикаси Президентининг расмий веб-сайти хабар берди.

 

Унда айтилишича, Нур-Султон шаҳрида олий даражадаги учрашув ва музокаралар бўлиб ўтади, уларда биродар халқларимиз ўртасидаги дўстлик, яхши қўшничилик ва стратегик шериклик муносабатларини янада мустаҳкамлаш йўллари кўриб чиқилади.

 

“Сиёсий мулоқот ва савдо-иқтисодий ҳамкорликни кенгайтириш, энг аввало, иқтисодиётнинг турли тармоқларида амалий алоқалар ва аниқ кооперация лойиҳаларини илгари суриш, шунингдек, маданий-гуманитар алмашинув дастурларини фаоллаштиришнинг долзарб масалалари ҳам кун тартибига киритилган”, - дейилади хабарда.

 

Хабарда таъкидланича, учрашувда Ўзбекистон ва Қозоғистон етакчилари халқаро масалалар юзасидан фикр алмашадилар ва минтақавий интеграциянинг асосий йўналишларини муҳокама қиладилар.

 

Маълумот учун, Саммит якунида салмоқли икки томонлама ҳужжатлар тўпламини имзолаш режалаштирилган.

 

Ташриф арафасида Нур-Султонда икки мамлакат етакчи компания ва тадбиркорлари иштирокида бизнес-форум ҳам ўтказилиши режалаштирилган.

 

Эслатма. Мамлакатмиз раҳбарининг давлат ташрифи арафасида бугун қўшни давлатимизнинг марказий газеталари — "Егемен Қазақстан" ва "Казахстанская правда" саҳифаларида давлатимиз раҳбарининг махсус интервюси чоп этилди.

 

Унда бугунги Ўзбекистон тараққиёти, икки томонлама муносабатларнинг ҳолати ва истиқболлари ҳамда Марказий Осиёдаги ҳамкорлик масалалари ҳақида сўз борган.

 

Аввалроқ Шавкат Мирзиёев Туркманистонга боргани ҳамда Ўзбекистон ва Россия раҳбарлари ўзаро манфаатли ҳамкорликнинг долзарб масалаларини кўриб чиқани ҳақида хабар берилганди.

 

Оламгир Абдиев