БАА миллий хавфсизлик бўйича маслаҳатчиси Эронга ташриф буюради
Эрон ташқи ишлар вазири ўринбосари Али Бағирий Теҳрон ва Абу-Даби муносабатларида янги саҳифа очишга аҳд қилганини билдирган.
Қайд этилишича, БАА президентининг миллий хавфсизлик бўйича маслаҳатчиси Таҳнун бин Зоид 6 декабрь куни Эронга ташриф буюради.
Бу ҳақда “ISNA” агентлиги хабар берди.
Унга кўра, сиёсатчи Теҳронга Эрон Миллий хавфсизлик олий кенгаши котиби Али Шамхоний таклифига биноан келади.
Маълумот учун: 2016 йилда Саудия Арабистонида шиа руҳонийси Нимр ан-Нимра қатл этилганидан ғазабланган эронлик намойишчилар Саудия Арабистонининг Теҳрондаги элчихонаси ҳудудига бостириб кирганидан кейин БАА Эрондаги дипломатик ваколатхоналар даражасини пасайтирганди.
Бундан ташқари, Саудия Арабистони ва Эрон ўртасидаги узоқ муддатли зиддиятларга 2019 йилда Саудия Арабистони нефть заводларига қилинган ҳужум ҳам сабаб бўлган. Бу воқеа Саудиянинг нефть ишлаб чиқариш ҳажмини деярли икки мартага қисқартирган. Ар-Риёд томони ҳужумда Эронни айбдор қилган. Расмий Теҳрон эса бу айбловни рад этган.
Эслатиб ўтамиз, аввалроқ Эрон ва Саудия Арабистони ўртасидаги муаммони ҳал қилиш учун саммит ўтказилиши кутилаётгани ҳақида хабар берилганди.
Чўлпоной Аҳмедова
