Метродаги “пробка”ни бартараф этиш учун қўшимча поездлар қўйилади

 

Бу ҳақда "Тошкент метрополитени” ДУК таркибий тузилмаларининг раҳбарлари билан ўтказилган йиғилишда айтиб ўтилди.

 

Хусусан, йиғилиш давомида қуйидаги масалалар топшириқ сифатида масъуллар зиммасига юклатилган.

 

Унга кўра:

—   Тирбандликларни олдини олиш, йўловчиларга қулайлик яратиш, хизмат кўрсатиш сифатини ошириш, поездлар ҳаракати оралиқ интервалларини қисқартириш мақсадида, поездлар ҳаракати жадвали қайта кўриб чиқиш;

 

—   Метрополитен барча йўналишларда “тиғиз пайтларда” оралиқ интервалларини максимал даражада қисқартириш ва барча имкониятлардан фойдаланган холда қўшимча ҳаракат таркиблари сонини кўпайтириш;

 

—   Метрополитеннинг асосий иш фаолиятига таъсир қилмаган холда “Чилонзор” электродепоси тасарруфидаги ҳаракат таркиблари техник кўрикдан ўтказилиб, ҳафта сўнггига қадар аниқланган носозликлар ва амалга оширилган ишлар юзасидан тасдиқловчи фото суратлар илова қилган холда маълумот тақдим этиш;

 

Бундан ташқари, жорий йилнинг сўнгги 6 ойлик даврида қайд этилган метрополитен ҳаракат таркибларининг техник носозлик туфайли линиядан четлатилганлиги холатлари сони, носозлик сабаблари, носозлик қайд этилган ускуна ёки тизимлар тўғрисида таҳлилий маълумот тайёрлаб киритиш ҳам кўзда тутилган.

 

Жумладан, ерусти халқа йўли қурилиш ишларининг 2 - босқичи № 8-9-10-11- метро бекатиларининг қурилиш объектига монтаж ишлар бўйича бириктирилган ишчи гуруҳнинг ҳар бир маъсул ходими томонидан қурилиш ҳолатини пухта ўрганиб, ҳафта давомида аниқланган ва аввал кўрсатилган лекин бартараф этилмаган камчиликлар бўйича маълумотлар, тасдиқловчи фотосуратлар илова қилинган холда шархлари билан тайёрлаб тақдим этиш вазифаси ҳам юклатилган.

 

Эслатиб ўтамиз, аввалроқ Россиядан Ўзбекистонга 20 та замонавий метро вагонлари юборилиши ҳамда 1 январдан "Тошкент метрополитени" ходимларига қўшимча рағбатлантиришлар жорий этилиши ҳақида хабар берилганди.

 

 

Чўлпоной Аҳмедова