Ўзбекистонга Қозоғистон ҳудудидан совуқ ҳаво кириб келмоқда
"Ўзгидромет" ҳафталик об-ҳаво маълумотини эълон қилди.
Бугун республика ҳудуди бўйича қуруқ ва ўртача илиқ об-ҳаво бўлиши кутилмоқда, ҳаво ҳарорати 9-14 даража илиқни ташкил этади. Бу ҳақда “Ўзгидромет” хабар берди.
Айтилишича, сешанба ва чоршанба кунлари Қозоғистон ҳудудидан нисбатан совуқ ҳаво кириб келади, бу фақат Ўзбекистон ҳарорат фонига таъсир қилади. Ушбу кунларда ҳарорат кечалари 0-5 даража илиқ, кундуз кунлари 9-14 даража илиқ атрофида сақланиб туради.
Пайшанба ва жума кунлари Эрондан илиқ ҳаво кириб келиши кутилмоқда. Ҳаво ҳарорати кечалари 0-5 даража илиқ, баъзи жойларда 2 даража совуққача атрофида бўлади, кундуз кунлари 15-17 даража илиққача кўтарилади.
8 декабрда шимолий туманларда, 9-10 декабрда Ўзбекистоннинг қолган ҳудудларида шамол тезлиги 15-20 м/с гача кучайиши мумкин. Туман тушиши мумкин.
Эслатиб ўтамиз, аввалроқ жануб ва воҳада ҳаво ҳароратининг максимумлари +21 даражагача кўтарилиши ҳамда Ўзбекистон ҳудудида аномал совуқ кузатилиши ҳақида хабар берилганди.
