АҚШ Эронга кучли босим ўтказмоқда
Ҳозирда Байден маъмурияти Эронга қарши санкцияларни кучайтиришга ҳаракат қилмоқда.
АҚШ Давлат департаменти 2015 йилги ядровий келишувни қайта тиклаш бўйича музокаралар ўтказди, маълум муддатга мувафаққиятга ҳам эришди.
Қайд этилишича, АҚШнинг делегацияси келгуси ҳафта Бирлашган Араб Амирликларига бориб, Теҳрон билан бизнес юритаётган ва санкцияларга риоя қилмаётган банкларни огоҳлантириши кутилмоқда.
“Wall Street Journal” нашрининг ёзишича, делегация Теҳрон билан миллиардлаб долларлик бизнес олиб бораётган нефт-кимё компаниялари ва бошқа хусусий фирмалар билан ҳам учрашув ўтказди.
Ушбу делегация таркибида АҚШ молия вазирлигининг хорижий активларни назорат қилиш бошқармаси бошлиғи Андреа Гакки ҳам бор. Хабарга кўра, агар музокараларда муваффақиятга эришилмаса, АҚШ Эронга иқтисодий босимни кучайтириш учун бошқа бир қанча давлатларга делегациялар юборишни режалаштирган.
Маълумот ўрнида: АҚШ Молия вазирлиги ўзининг санкциялар рўйхатига Эрон, Сурия ва Угандадан бўлган 15 нафар шахсни, жумладан, ҳарбийларни ҳам тинч аҳолига қарши репрессив ҳаракатларга алоқадор деб киритди.
Эслатиб ўтамиз, аввалроқ Эрон ядро дастури бўйича музокараларнинг янги раунди бошланиши ҳамда БАА миллий хавфсизлик бўйича маслаҳатчиси Эронга ташриф буюриши ҳақида хабар брилганди.
Чўлпоной Аҳмедова
