Покистон армияси аскари мамлакат жануби-ғарбида содир этилган терактда ҳалок бўлди
Бир гуруҳ қуролли экстремистлар томонидан назорат-ўтказиш пункти ўққа тутилган.
“The Express Tribune” нашрининг ёзишича, воқеа Абдой секторида содир бўлган.
Хабарга кўра, Покистон жануби-ғарбидаги Балужистон вилоятида жангарилар ҳужуми оқибатида Покистон армияси аскари ҳалок бўлди.
Назорат пункти қўриқчиларининг ўқлари остида террорчилар ҳам йўқотишлар билан чекинишди.
Сўнгги ойларда Покистон ҳукуматининг мамлакатни марказлаштиришни кучайтиришга қаратилган чора-тадбирларига қарши чиққан миллатчи ва айирмачи гуруҳларнинг кучайиши натижасида вилоятда кескинлик кучайган.
Маълумот ўрнида: ноябрь ойида Покистон армиясининг 3 нафар аскари Балужистондаги ҳужумларда ҳалок бўлган, 7 нафари яраланган эди.
Эслатиб ўтамиз, аввалроқ Ироқ ҳарбий базасига ракета отилгани ҳамда Афғонистоннинг Жалолобод шаҳрида яна отишма содир бўлгани ҳақида хабар берилганди. Шунингдек, ИШИД толибларнинг 17 нафар аскарини ўлдирганди.
Чўлпоной Аҳмедова
