Журналистлар "Ғиждувон" эркин иқтисодий зонаси билан танишди
Шу кунларда бир қатор ОАВ ходимлари иштирокида республикамиз вилоятларида пресс-турлар ташкил этилмоқда.
Бугун Президент Администрацияси хузуридаги Ахборот ва оммавий коммуникациялар агентлиги томонидан ОАВ ходимлари учун Бухоро вилоятининг "Ғиждувон" эркин иқтисодий зонасида преcс-тур ташкил этилди.
Ушбу пресс-тур доирасида журналистлар "Buxoro Fayz Tekstil" МЖЧ корхонаси билан яқиндан танишди. Корхона раҳбари Мустақин Тўхтаевнинг таъкидлашича мазкур ишлаб чиқариш зонасида 200 га яқин иш ўринлари яратилган бўлиб, келгуси йилда яна 100 нафар аҳолини иш билан таъминлаш режалаштирилган.
- Бу ишлаб чиқариш корхонасини 2017 йилда ташкил этган эдик. Мана шу вақт мобайнида бир қатор ишларни амалга оширдик. Хусусан, корхонамизда экспорт ҳажмини йилдан-йилга ошириш режаси ишлаб чиқилган. Ўтган пандемия даврида экспорт миқдори 5 миллион долларни ташкил этган бўлса, келгусида бу кўрсаткичларни 7-8 миллион долларга етказиш ниятимиз бор. Бугунги кунда корхонамизнинг асосий экспортини ип-калава маҳсулотлари ташкил этмоқда. Кейинги йилда Бельгия давлати билан ҳамкорликда бўз маҳсулотини ишлаб чиқаришни йўлга қўймоқчимиз. Шу тариқа ип-калава билан бир қаторда, бўз маҳсулотини ҳам экспорт қилишни мақсад қилганмиз.
Эслатиб ўтамиз, мазкур "Ғиждувон" эркин иқтисодий зонаси Ўзбекистон Республикаси Президентининг 2017 йил 12 январдаги ПФ-4931-сонли "Ургут", "Ғиждувон", "Қўқон" ва "Ҳазорасп" эркин иқтисодий зоналарини ташкил этиш тўғрисида"ги Фармонига асосан ташкил этилган.
