Марғилонда "Nexia-3" хатланиши ҳисобига қарз ундирилди
Бу ҳақда МИБнинг жамоатчилик билан алоқалар ва ҳуқуқий ахборот бўлими бошлиғи Фаррух Тошпулатов Zamon.uz'га маълум қилди.
Фуқаро А.Турсунбоев "Капиталбанк"дан маълум миқдорда кредит олган. Аммо баъзи шахсий сабабларга кўра фуқаро кредитни ўз вақтида қайтаролмаган. Шундан сўнг "Капиталбанк" А.Турсунбоевни судга берган.
Фуқаролик ишлари бўйича Марғилон туманлараро судининг 15.12.2021 йил кунги суд буйруғига асосан қарздор А.Турсунбоевдан “Капиталбанк” фойдасига 69.515.447 сўм кредит қарзи 2.780.618 сўм давлат божи ундириш ҳақидаги ижро ҳужжатлари бўйича Мажбурий ижро бюроси Марғилон шаҳар бўлими томонидан мажбурий ижро ҳаракатлари олиб борилди. 16.12.2021 йил куни қарздор А.Турсунбоевга тегишли бўлган "Nexia-3" автотранспорт хатланиб жарима майдончасига олиб кирилди.
Давлат ижрочиси томонидан мазкур автотранспорт воситасини баҳолаш ва электрон онлайн-аукцион савдоларига қўйиш чораларини кўраётган вақтида 20.12.2021 йилда қарздор А.Турсунбоев "Капиталбанк" фойдасига 69.515.447 сўм кредит қарзини, давлатга 2.780.618 сўм давлат божини тўлаб қўйганлиги сабабли, автотранспорт воситаси хатловдан чиқарилди ва ижро иши амалда якунланди.
Муножат Валиева
