"Космонавтлар" метро бекатида поезд вагони ёндими?
Бугун ижтимоий тармоқларда “Kosmonavtlar” метро бекатида кучли ёнғин чиққани ҳақида видео тарқалди.
Аслида воқеа қандай бўлган?
Тошкент шаҳар ФВБ матбуот хизмати раҳбари Анвар Рустамовнинг айтишича , бугун, 23 декабрь куни соат 12:15 да Шайхонтохур тумани “Kosmonavtlar” метро бекатида ҳаракатланиб кетаётган 4 та вагондан иборат таркибнинг 3-вагонида қисқа туташув бўлган. Бунга сабаб вагон сақлагич (предохранитель) куйгани ёки тормоз колодкаси сиқиб қолгани тахмин қилинмоқда. Ёнғин келиб чиқмаган. Носоз вагон — таъмирлаш учун ДЕПОга юборилган.
Тошкент метрополитени ДУК хабарида эса 12:10 лар атрофида "Космонавтлар" метро бекатида 34-сонли ҳаракат таркибида машинист томонидан носозлик аниқланди, дейилади ва йўловчилардан узр сўраган.
Шунингдек, фуқаролар хавфсиз жойга эвакуация қилинган. Ҳодиса оқибатида жабрланган ва ҳалок бўлганлар йўқ.
Воқеа жойига шаҳар ҳамда туман ФВБ раҳбар ходимлари ва 2 та ёнғин-қутқарув экипажлари жалб этилган. Ҳозирда вазият оқибатлари бартараф этилган.
Аввалроқ Тошкент метросининг "Сергели" йўналишида поездлар ҳаракати вақтинча тўхтатилгани ҳамда Россиядан Ўзбекистонга 20 та замонавий метро вагонлари юборилгани ҳақида хабар берилганди.
Муножат Валиева
