Бу гал тескариси: номаълум киши Жанубий Кореядан КХДРга қочиб ўтди
Пхеньян ҳозирча ҳеч қандай реакция билдирмади.
1 январь куни Жанубий Корея тарафдан номаълум киши Шимолий Корея чегарасини кесиб ўтди. Бу ҳақда "Рёнхап" агентлиги хабар берди.
Унда айтилишича, махсус мослама маҳаллий 21:20 да демилитация зонасида инсон ҳаракати мавжудлигини аниқлаган. У ҳақдаги маълумотлар ошкор қилинмаяпти.
“Уни тутиш учун ҳарбийлар жалб қилинди. Операцияни ўтказиш давомида 22:40 да у демаркация чизиғини кесиб ўтди (Шимолий Корея билан амалдаги чегара) ҳамда Шимолга қочиб кетди”, — дея маълум қилган Корея Республикаси штаб бошлиқлари бирлашган қўмитаси.
2 январь куни тонгда Жанубликлар КХДРга бу ҳақда маълумот жўнатган. Ҳозирда қочоқнинг аҳволи қандайлиги маълум эмас. Шимол ҳарбийлари томонидан ҳам алоҳида ҳаракатлар кузатилмаяпти.
Аввалроқ КХДР аҳолисига 11 кун кулиш тақиқлангани тўғрисида хабар берилганди.
Жаҳонгир Қўзиев
