АОКА фаолияти қайта ташкил этилади
Журналистика ва оммавий коммуникациялар университитети агентлик таркибига ўтказилади.
Ўзбекистонда Ахборот ва оммавий коммуникациялар агентлигининг фаолияти халқаро ташкилотларнинг сўз ва матбуот эркинлиги соҳасидаги тавсиялари асосида қайта ташкил этилади.
Бу 2022-2026 йилларга мўлжалланган Тараққиёт стратегияси лойиҳасида қайд этилди.
Маълум қилинишича, АОКА бошқа давлат органлари ва ташкилотлардан мустақил ҳамда Олий Мажлис палаталари олдида ҳисобдор шаклда қайта ташкил этилади. Ташкилот мавжуд штат бирликлари ва меҳнатга ҳақ тўлаш шартлари ва миқдорини сақлаб қолади.
Давлат органлари ва ташкилотлари фаолиятининг очиқлиги, шунингдек, матбуот котиблари фаолияти самарадорлиги рейтинги тузилади. Бу орқали соҳада юқори натижаларга эришган ташкилотлар матбуот котибларини рағбатлантириш тизими йўлга қўйилади.
Бундан ташқари, лойиҳада ахборот соҳасини тартибга солувчи ягона тизимлаштирилган норматив-ҳуқуқий ҳужжат лойиҳасини ишлаб чиқиш режалаштирилган. Бунда замон талаблари асосида ахборот соҳасидаги қонунчиликни такомиллаштириш назарда тутилган. Қолаверса, соҳани тартибга солишга қаратилган қонунлар Ахборот кодекси шаклида унификация қилинади.
