Ўзбекистон халқи Янги йилни «Sevimli» билан кутиб олди!
«Kantar research» халқаро ташкилотининг Ўзбекистондаги телеканаллар рейтингини баҳолаш тизими 2021 йил 31 декабрь кун давомида ва 1 январга ўтар кечаси энг кўп кўрилган телеканал «Sevimli» бўлгани ҳақидаги маълумотни тақдим этди.
Қувонарлиси шундаки, Ўзбекистон Республикаси Президенти табригини Республикамиздаги телевизор кўрувчи жами томошабиннинг 33,2 фоизи "Sevimli" телеканали орқали томоша қилган. Бу ўртача 9 млн. томошабин деганидир.
Байрам оқшомида тайёрланиб, соат 20-00 дан эфирга узатилган «Файзли Янги йил шоуси» дастури эса ўртача 7.6 рейтингдан 10 рейтинггача кўтарилиб, 30-33 фоизли аудиторияни қамраб олган.
Қайд этиш керакки, "Kantar Research" МЧЖ халқаро ташкилоти айни кунда дунёдаги 100 дан ортиқ давлатда телевидение аудиторияси тадқиқотларини олиб боради. Жаҳондаги йирик компания ва корпарациялар, тадбиркорлик субъектлари айнан мана шу ташкилот ҳисоботларига таяниб телеканалларга ўз маҳсулотлари рекламасини жойлаштиради.
Компаниянинг 2021 йилдаги тадқиқотлари натижасига кўра, мамлакатимизда “Sevimli” телеканали умумий 2,1 фоиз кўрсаткич билан биринчи, 1,4 фоизлик кўрсаткич билан "Zo‘r TV" телеканали иккинчи, 1,1 фоизлик натижа билан “Milliy TV” учинчи, 1 фоизлик натижа билан эса “Mening yurtim” телеканали тўртинчи ўринни банд этди.
Телетомошабинларнинг енгил-елпи, мусиқий-кўнгилочар кўрсатувларга нисбатан таҳлилий-танқидий, ижтимоий-сиёсий ахборотларга бўлган қизиқиши ортган. Жумладан, "Sevimli" телеканалида ҳар куни 4 маротаба тўғридан-тўғри жонли тарзда эфирга узатилаётган "Zamon" информацион-таҳлилий дастурини умумий телеаудиториянинг 14,1 фоизи томоша қилган ва барча телемаҳсулотлар орасида биринчи ўринни қўлга киритган. “Хайрли оқшом” ҳамда “Маҳаллада дув-дув гап” ток-шоусини юртимиздаги телевизор кўрувчи фаол томошабиннинг ўртача 13,2 фоизи кузатгани эса Янги Ўзбекистон даврида одамларнинг дунёқараши ўзгараётгани, ахборотга бўлган талаби ўсиб бораётганини англатади.
Бир сўз билан айтганда, "Sevimli" телеканали 2021 йилда 6-65+ yoshli аудитория орасида энг кўп кўрилган телеканал бўлди. Жами мақсадли аудиторининг 15,6 улуши билан Ўзбекистоннинг биринчи рақамли телеканали номини 2021 йилда ҳам сақлаб қолди.
"Sevimli" телеканали ижодий ва техник жамоаси ҳар бирингизга меҳрингиз ва ишончингиз учун, биз билан бирга бўлганингиз учун раҳмат айтамиз. 2022 йилда ҳам яхши лойиҳалар билан кўнглингиздан жой олишга ҳаракат қиламиз!
Қаҳрамон Сайдалиев
"Севимли" телеканали бош муҳаррири
