Коронавирус билан боғлиқ вазият тобора мураккаблашмоқда
ССВ Ўзбекистонда касалликка чалиниш ҳолати яна ортиб бораётганини маълум қилди.
Кеча юртимизда қарийб 370 нафар кишида коронавирус инфекцияси аниқланди. Энг кўп касалланиш ҳолати пойтахтда (+195 та), шунингдек, Тошкент (+56 та) ва Самарқанд (+42 та) вилоятларида кузатилган.
Бундан ташқари, 2 нафар коронавирусга чалинган бемор вафот этиб, касалликдан вафот этганлар сони 1494 нафарни ташкил қилди.
Соғлиқни сақлаш вазирлиги дунёда коронавирус билан боғлиқ вазият янада мураккаблашаётганини ва "омикрон" штамми қатор мамлакатларда кескин карантин чораларини қўллашга сабабчи бўлаётганини маълум қилиб, аҳолини қарантин қоидаларига қатъий риоя қилишга чақирган.
“Афсуски, сўнгги кунларда юртимизда ҳам касалланишлар сони яна орта бошлади. Тўғри, ҳали мамлакатимизда "омикрон" штамми аниқлангани йўқ, бироқ бу хотиржамликка берилиш учун асос бўла олмайди. Шу сабабли барча юртдошларимиздан дунёдаги мураккаб эпидемиологик вазиятдан тўғри хулоса чиқарган ҳолда карантин қоидаларига қатъий риоя қилиб, касалликка қарши тўлиқ эмланишларини сўраб қоламиз” , – дейилади вазирлик хабарида.
Жавоҳир ТУРСУНОВ
