Январь ойининг дастлабки ўн кунида “Тез ёрдам”га 350 мингга яқин одами мурожаат қилган
9-10 январь кунлари мурожаатлар сони бироз ортиб, қарийб 37 мингтага етди.
Охирги 4-5 кун ичида мамлакатимизда касалланиш ҳолатлари кескин ортгани, кунлик кўрсаткичлар 600 тадан ошгани барчани жиддий ташвишга солмоқда. Қолаверса, бу ҳолат "Тез ёрдам"га бўлган талаб ва кунлик чақириқларнинг кўпайишига ҳам сабаб бўлмоқда. Буни “103” хизматига келиб тушаётган мурожаатлар сонидан ҳам билиш мумкин.
Рақамларни таҳлил қилсак, 2022 йилнинг 1-10 январь кунлари Республика тез тиббий ёрдам хизматига жами 349 минг 436 та чақириқ келиб тушди. Шундан тана ҳароратининг кўтарилиши бўйича 32 минг 400 та, коронавирусга гумон қилинган, касалликка чалинган ва бошқа юқумли касалликлар билан 1338 та мурожаат қайд этилган.
Таққослаш учун, 2021 йил декабрь ойи дастлабки ўн кунлигида "Тез ёрдам"га мурожаатлар 320 минг 980 тани ташкил қилган эди.
Шунингдек, янги йилнинг илк кунлари “103” хизматига бир кунда ўртача 34 минг 600 та чақириқ қабул қилинган бўлса, январнинг 9-10 кунлари мурожаатлар сони бироз ортиб, қарийб 37 мингтага етган.
Муножат Валиева
