Мени туҳмат билан қаматишди
3 йилу 6 ойга озодликдан маҳрум этилдим.
Дилафрузнинг сўзларига кўра, у 2016 йил Олимбек Мубиевга турмушга чиққан. 2 йилдан сўнг турмуш ўртоғи 2018 йил инсульт касаллиги билан хасталаниб қолгач, улар турли қиийнчиликларга дуч кела бошлайди.
— Қайинсинглим аёллар савдоси билан шуғулланарди. У мени ёлғиз оила тебратишимни кўриб, раҳми келди, шекилли, уйимга бир татар миллатига мансуб аёлни олиб келди. Альбина менга уй ишларида ёрдам беришини айтди. У аёл спиртли ичимлик ичар экан. Мен ишдалигимда уйга бегона эркакларни олиб келиб, маишат қиладиган одат чиқарди. Бир куни тунги соат 02:30 лар чамаси шовқиндан уйғониб кетдим. Альбинанинг хонасига кирсам, бир эркак билан спиртли ичимлик истеъмол қилиб ўтирган экан. Жаҳл устида иккисини ҳам ўша заҳоти уйдан ҳайдаб юбордим.
Эртаси куни қайинсинглим келиб роса тўпалон кўтарди. Қизни уйга киритишимни айтди. Иложсизликдан қизни киритдим. Кунларнинг бирида тунда ётоғимга ўша йигит кириб, менга ташланди. Мен уни бор кучим билан итариб юбордим. У мени йўлаккача судраб чиқди. Альбина эса воқеани телефонига съёмка қилди. Табиийки, мен ҳам бунга жавобан уларни ётоқда телефонга съёмка қилдим ва телефонимни қизнинг қўлига бериб: “съёмка қилиш мана шундай бўлади” — дедим.
Эртаси куни уйимизга Ички ишлар ходимлари келиб, мени олиб кетишди. Менга Альбинанинг йигитига ОИТС касаллигини юқтирганликда айблашди. 3 йилу 6 ойга озодликдан маҳрум этилдим.
Альбина мени ўша йигити билан яқинликда бўлганимни ва унга ОИТС юқтирганимни, йигит эса касалликни Альбинага юқтирганини ёзиб берган.
Ўзингиз нима деб ўйлайсиз, нега сизга туҳмат қилишган, қаерда хато қилгансиз?
— Эрим касал бўлганидан кейин шифокорлар уни узоқ яшамайди дейишди. Қайинсинглим, турмуш ўртоғимнинг аввалги хотини ва ўғли мен билан уй талашишни бошлашди. Улар мендан қутилиш учун шу найрангни режалаштириб, қаматишди. Мендан ОИТСга таҳлил олишди. Бироқ менда бундай касаллик аниқланмаган. Жазо муддатини ўтаб, қайтиб келдим. Келсам эрим оч ва қаровсиз қолиб кетганини айтди. Ҳозир ҳам уйимиздан жанжал-тўполон аримаяпти. Мени уйдан чиқиб кетишимни талаб қилишяпти. Аммо мен эримни ташлаб кетолмайман.
Биз Дилафрузнинг турмуш ўртоғи ростдан ҳам қаровсиз қолиб кетганига ишонч ҳосил қилиш мақсадида Олимбек Мубиев билан боғландик. Суҳбат давомида у инсультдан сўнг яхши гапира олмаслигини, аммо воқеа тафсилотларини айтиб беришга ҳаракат қилишини айтди.
Унинг айтишича, у ўғли Маҳмуд томонидан доимий калтакланиб, оч қолдирилган. ўғлининг бу ишларидан ягона мақсад — уйни олиб қўйиш бўлган. Хасталигидан фойдаланиб, яшаётган уйига ўғли ноқонуний тарзда доимий рўйхатдан ўтиб олганини билдирди.
Воқеадан хабардор адвокат Мунаввар Тошмуҳаммедова эса воқеани қуйидагича изоҳлади:
— Давлат ҳеч қачон ўз-ўзидан бировни қамамайди. Дилафруз Мубиевада айб катта. Альбинани ижарага ўзи қўйган. У билан доимий спиртли ичимликлар ичган. Спиртли ичимликлар сотадиган дўконга кўп маротаба ароқ олгани кирганини дўкон ходимлари ҳам тасдиқлайди. Агар у айтганидек, туҳмат билан қамалган экан, нега апелляция ва кассация шикояти бермаган.
Мен ҳукм билан танишиб чиқдим. Дилафруз уйидан Альбина ва унинг олдига келадиган одамлар учун шароит яратиб берган. Қўшмачилик қилгани учун қамалган.
Танганинг иккинчи томони бор: биз Дилафрузнинг ҳикоясини тингладик. Хулоса бир томонлама бўлмаслиги учун қайнисинглиси Нодира Исламова билан ҳам боғландик:
— Дилафрузнинг гаплари ҳаммаси туҳмат. Альбинани мен олиб келмаганман. Уларнинг ўзи қизни уйига олиб келиб, ижарага қўйишган. Уйидан маст одамлар аримасди. Ўзлари ҳам уларга қўшилиб ичишарди. Акам, аслида, Дилафрузни уй ишларида ёрдам беради, кир-чиримни ювади деб "Қўйлиқ" бозори яқинидаги "мост таги"дан олиб келган. Фолбинларга бориб, иссиқ-совуқ қилиб, акамни бошини айлантириб олди. Кейинчалик никоҳдан ўтиб, уйни ўзини номига ўтказиб олди. Қамоқхонада бўлган вақтида акамга ўзим қарадим. Маҳмуд ҳам ёрдам берди.
Дилафруз бир ҳафта олдин судга ажрашишга ариза ташлабди. Энди уйни ўзининг номига ўтказиб олгач, акамни аста-секин чиқариб юборади. Икки ўртада акам уйсиз қолади. Шуни ҳеч ким тушунмаяпти.
Илмира Музаффарова “Тонг” МФЙ раиси ўринбосари:
— Бу оила анчадан буён нотинч оилалар рўйхатида туради. Олим Мубиев уйига турли одамларни тўплаб, улар билан доимий спиртли ичимликлар ичиб келган. Инсульт бўлишига сабаб ҳам айнан шу ичкилик сабаб бўлган.
Дилафруз ҳаммага эрининг яқинлари туҳмат билан қамашганини айтмоқда. Аслида, қўшмачилик қилгани учун қамалган. Қўшниларнинг ҳаммаси бу оиладан безор. Яқинда эри билан ажрашишга ариза берибди. Сабаблари сўралганда фарзанди йўқлигини рўкач қилди. Уйни ўз номига ўтказиб олган. Энди Олимжон Мубиевни кўчага ҳайдаб юборишидан ҳавотирдамиз.
Биз Дилафруз Мубиевадан ажримдан сўнги режаларини сўрадик. Аёл келгусида бошқа оила қуриб, фарзандли бўлишни истаётгани, келгусида уйни сотиб юборган тақдирда ҳам Олимбек Мубиевни кўчага ташлаб қўймаслигини, ғамхўрлик қилишини айтди.
Муножат Валиева
