Оч қолган бўрсиқ Рим империяси даврига тегишли 209 та танга топиб олди
Биологлар бўрсиқ оч қолгани учун қишки уйқудан уйғониб, овқат қидирганини айтишмоқда.
Итлар қидирув ишларида қатнашиши ҳеч биримизни ҳайрон қолдирмайди. Аммо аниқланишича, бўрсиқлар ҳам исковучлик хусусиятига эга экан. Мақоламиз қаҳрамони ҳам ана шу хислати билан машҳур бўлди. У Рим империяси даврига оид хазинани топиб олди. Бу ҳақда The Guardian хабар бермоқда.
Хазина Испаниянинг Астурия ҳудудидаги Градо муниципалитетидаги ғордан топилган. Ғорга келганлар бўрсиқнинг уяси яқинида қазиган ўрани кўриб қолишган. Ўра ичида III-V асрларда Рим империясининг турли ҳудудларида зарб қилинган 209 та танга бўлган. Улар орасида Константинополь ва Фессалоники (ҳозирги Солоники) ва ҳатто Лондониум (ҳозирги Лондон)да муомалада бўлган динорлар бор.
Тангаларнинг энг каттаси 8 грамм, аммо унинг таркибида атиги 4% кумуш аниқланган. Шунга қарамай, олимлар учун бу топилма тенгсиз хазинадир.
Маълумот учун, бу Градо шаҳридаги биринчи қадимий топилма эмас. Ўтган аср ўрталарида император Константин даррига тегишли 14 та олтин танга топилган.
