Хонанда Равшан Намозовга моддий ёрдам эмас, фақат қон керак

 

Ижтимоий тармоқларда Ўзбекистонда хизмат кўрсатган артист Равшан Намозовнинг гематология шифохонасида даволанаётгани, унга шошилинч қон кераклиги, саломатлиги жиддий хавф остида экани ҳақида хабарлар тарқалди. Вазиятга ойдинлик киритиш мақсадида Zamon.uz мухбири санъаткор даволанаётган шифохонага борди. 

 

Гематология бўлими шифокорларининг айтишича, беморнинг аҳволи қониқарли эмас. Унга фақат қон керак. 

 

— Беморга ҳеч қандай молиявий ёрдам керак эмас. Ҳар қандай қон гуруҳи бўлишидан қатъий назар бизга донорлар керак, — дейди беморнинг шифокори. 

 

Тармоқларда тарқалган хабарда ҳам исталган қон гуруҳи керак дейилганди. Шифокор ҳам бу маълумотни тасдиқлади. Шунингдек, Равшан Намозовнинг қон гуруҳи 3+ эканини айтди. Қизиғи, бу турдаги қон гуруҳига исталган эмас, фақат учинчи ва биринчи қон гуруҳи тўғри келади. “Барча турдаги қон гуруҳи” қабилидаги эълонларга нима сабаб бўлгани эса ноаниқ.

 

Биз хонанданинг аёли боғландик. 

 

— Аввалдан қон билан боғлиқ касалликлари бор. Турмуш ўртоғим 2 ойдан буён даволаняптилар. Ҳеч қандай моддий ёрдам сўраганимиз йўқ. Бизга фақат донорлар керак. Хабар тарқалганидан сўнг кўпчилик телефон қилиб ҳол-аҳвол сўради. Санъаткорлар, ўзларининг шогирдлари ва мухлислари қон ҳам топширди. Лекин ижтимоий тармоқлардаги хабарлар биздан тарқамаган. Ким, нима учун, қандай мақсадда моддий ёрдам ва исталган қон гуруҳи кераклиги ҳақида хабар тарқатгани ҳам бизга қоронғу. Ҳатто ўлди, деб гап тарқатишди. Менга ҳам телефон қилиб шу ҳақида сўрашди. Равшан акани аҳволи ҳозир анча яхши. Савоб учун қон бериш истаги борлар бориб, қон топширса бўлади.

 

Санъаткор ўз ижоди билан мухлислари ва халқ меҳрини қозона олган. Шу сабаб, яхшилик қилувчилар топилган. Афсуски, бу каби вазиятдан унумли фойдаланадиган устаси фаранглар ҳам орамизда йўқ эмас. Тарқатилаётган ахборот қандай бўлишидан қатъи назар у яхшиликка хизмат қилиши керак.

 

Юлдуз Рустамова