Андижонда 12 та соғлом дарахт ҳоким буйруғи билан кесиб ташлангани ростми?
Бу бўйича вилоят ҳокимлиги расмий маълумот берди.
Куни кеча ижтимоий тарқмоқларда Андижон вилоят перинатал маркази ҳовлисида яшнаб турган 12 та дарахт кесиб ташлангани ҳақида хабар тарқалди.
Kun.uz мухбирининг айтишича, кесилган дарахтлар касал эмас, ям-яшил яшнаб турган сосналар — нинабаргли манзарали дарахтлар. Улар Андижон шаҳар ободончилик корхонаси ходимлари томонидан тунда, иш вақтидан сўнг кесиб, негадир номерсиз машинада ташиб кетилаётган бўлган. Шунингдек, хабарда вилоят ҳокими Шуҳратбек Абдураҳмонов перинатал марказнинг янги қурилган биносининг олди очилсин, деб дарахтларни кесишни буюргани ҳақида ёзилган.
Вилоят ҳокимлиги бу бўйича муносабат билдириб, юқоридаги ишлар ҳоким буйруғи асосида амалга оширилганини рад этди.
Расмий маълумотга кўра, ҳозирги кунда вилоят перенатал марказида кенг кўламли қурилиш-таъмирлаш ишлари ва 180 дан ортиқ манзарали дарахт ва кўчатлар экиш ишлари амалга оширилмоқда. Ҳудуддаги дарахтлар ўз жойида турибди ва хеч ким уни кесиб ташлаш тўғрисидаги буйруғини бермаган.
“Юқорида келтирилган ҳолат вилоят ҳокимлиги томонидан алохида назоратга олинди. Ҳудудда конун бузилиш ҳолатлари аниқланган такдирда айибдорларга қонуний жазо чоралари кўрилиши ва бу ҳақида батафсил ахборот берилишини маълум қиламиз”, – дейилади хабарда
Жавоҳирбек Турсунов
