Ислом Каримовнинг неваралари бобосининг қабрини зиёрат қилишди
Аввалроқ Гулнора ва Лола Каримоваларнинг қизлари Имон ва Марям 8 йил деганда Тошкентда дийдор кўришгани ҳақида хабар қилинганди.
Гулнора Каримованинг қизи Имон Каримова 16 январь куни ўзининг "Инстаграм"даги саҳифасида жойлаган суратларнинг бирида Лола Каримованинг тўнғич фарзанди Марям билан Ислом Каримовнинг қабрига гуллар қўйгани акс этган. Сурат остидаги изоҳда эса Самарқанд ва бобоси ҳақида хотираларини ёзиб қолдирган:
“Самарқанд мен учун муҳим шаҳар. Унда тарих, маданият, санъат, қадриятлар мужассам. Узоқ муддатдан сўнг илк бор бу ерга келганимдан сўнг мен Самарқанднинг фақат ўзигагина хос бўлган муҳитини севиб қолдим. Бобом ҳар доим бу гўзал шаҳар ҳақида ва ўзи улғайган жойлар: ҳар куни Регистон орқали мактабга борган ерлари ҳақида гапирарди. У биларди ва билганларини улашишни ёқтирарди, энг муҳими эса уни тинглаш доим қизиқ бўлган. Ҳар гал Ўзбекистонга келганимда бу ерга қайтаман. Бу ерда мен ўзимни ҳотиржам ҳис қиламан”, – дейди Имoн Каримова.
Марям Тиллаева ҳам ўзининг "Инстаграм"даги саҳифасида шу суратни жойлаб, бобосининг қабрини илк бор зиёрат қилаётганини, буни анчадан бери ният қилганини ёзиб қолдирган.
