Яманда очлик билан боғлиқ вазият кескинлашмоқда — БМТ
Мамлакатнинг айрим чеккаларида одамлар дарахт баргларини истеъмол қилаётгани айтилмоқда.
Яманда айрим оилалар очликдан ҳалок бўлмаслик учун дарахт баргларини ейишга мажбур бўлмоқда. Бу ҳақда БМТ бутунжаҳон озиқ-овқат дастурининг Twitter’даги саҳифасида маълум қилинди.
Унга кўра, мамлакатда низо ва иқтисодий инқироз тобора чуқурлашиб боряпти. Яманнинг урушдан энг кўп азият чеккан вилоятлари, хусусан, шимоли-ғарбдаги Хаджада одамлар дарахт барглари истеъмол қилишга мажбур бўлмоқда.
БМТ бутунжаҳон озиқ-овқат дастури 2022 йилда Яманга ажратиладиган ёрдам миқдори камайишини маълум қилган. Молия манбаларининг камайганлиги бунга сабаб қилиб кўрсатилган.
Яманда 2014 йилдан буён уруш давом этмоқда.
Аввалроқ БМТ сайёрада 3 миллиард инсон тўйиб овқатланмаслигини маълум қилганди.
Жаҳонгир Қўзиев
