Ўйнаб гапирсанг ҳам ўйлаб гапир
Россиядаги ўзбек фуқароси хоразмликларни ҳақоратлади.
"XORAZM ONLINE” You Tube ижтимоий каналида номаълум шахс юртимиз аҳолисига нисбатан ҳақоратомуз гаплар билан мурожаат қилган видеолавҳа жойлаштирилган.
Бунга жавобан, жамоатчилик фаоли А.Авезов, ушбу фуқаро аниқланиб, унга нисбатан қонуний чора кўришликни сўраган.
Ўрганиш натижасида, миллий шаън ва инсон қадр-қимматини камситишга қаратилган мазкур видеолавҳани тайёрлаган шахс 1986 йилда туғилган, Ўзбекистон Республикасининг фуқароси М.А. эканлиги ҳамда ўтган йилнинг май ойидан буён Россия Федерациясида яшаб келаётгани аниқланган.
Ушбу видеолавҳада миллий, ирқий, этник ёки диний адоват қўзғатиш ҳамда аҳоли гуруҳлари ўртасида нифоқ келтириб чиқариш мақсади бўлганлигини инобатга олган ҳолда М.А.нинг ҳаракатларига ҳуқуқий баҳо бериш учун "Судга оид сиёсатшунослик ва лингвистика" экспертизаси тайинланган.
Экспертиза натижаларига кўра, шахснинг ҳаракатларига ҳуқуқий баҳо берилиб, жамоатчиликка эълон қилинади.
