Туркия президенти ва рафиқаси коронавирусга чалинди
Давлат раҳбари ва биринчи хонимда "Omicron" аниқланган.
Туркия президенти Ражаб Тоййиб Эрдўғон рафиқаси Эмине билан бирга COVID-19 га қарши топширган тести ижобий чиққанини маълум қилди. Бу ҳақда давлат раҳбари ўзининг Тwitter саҳифасида хабар қилган.
"Ишимизни уйдан давом эттирамиз. Дуоларингизни интиқлик билан кутамиз", деб ёзган Эрдўғoн.
Туркия президентининг қайд этишича, у ва унинг рафиқасида касаллик енгил аломатлар билан ўтмоқда.
Аввалроқ Эрдўғон рафиқаси билан Украинга ташриф буюрган эди.
Эслатиб ўтамиз, Туркия парламенти Озарбайжон билан ҳарбий ҳамкорликни назарда тутувчи қонунни қабул қилгани хабар қилинган эди.
