Танасига арматура бўлаги кириб кетган 17 ёшли йигитнинг ҳаёти сақлаб қолинди
Ушбу мураккаб операция 5 соатдан ортиқ давом этган.
Ижтимоий тармоқларда Республика шошилинч тиббий ёрдам илмий марказида танасига арматура бўлаги кириб кетган 17 ёшли йигитнинг операция қилиниш жараёни акс этган видеолавҳа тарқалди. Бу бўйича ССВ қўшимча маълумот берди.
Хабар қилинишича, 2005 йилда туғилган Р. С исмли фуқаро 20 декабрь куни қурилиш жараёнида 2-қаватдан йиқилиб тушган ва танасига диаметри 15 мм.лик иккита арматура бўлаги кириб кетган. Шундан сўнг у зудлик билан "Тез ёрдам" машинасида шифохонага олиб келинган.
Тиббиёт марказида беморнинг бош мия, бўйин, кўкрак ва бел-умуртқа соҳалари, кўкрак қафаси, қорин бўшлиғи аъзолари МСКТ ҳамда ультратовуш текширувларидан ўтказилган.
Шифокорнинг сўзларига кўра, металл парчаси бемор кўкрак қафасининг ўнг орқа юзаси, 7 ва 9-қовурғалари орасидан кириб, 6-кўкрак умуртқасини тешиб ўтган ва орқа мия эзилишига сабаб бўлган. Сўнгра ўнг ўмровости артерияси тагидан ўтиб, бош суяги мия асосининг ўрта чуқурчасини тешиб кирган.
Шу куни марказнинг 10 дан ортиқ энг малакали мутахассислари томонидан 5 соатдан отиқ вақт давомида мураккаб жарроҳлик операцияси амалга оширилган ва беморнинг ҳаёти сақлаб қолинган.
