Шавкат Мирзиёев янги қурилиш лойиҳалари билан танишди
Тақдимотда Тошкент шаҳрини ёндош ҳудудга кенгайтириш, янги қуриладиган мавзеларни транспорт хизматлари билан таъминлаш бўйича лойиҳалар кўриб чиқилди.
Бугун, 7 февраль куни Президент Шавкат Мирзиёев қурилиш лойиҳалари тақдимоти билан танишди.
Тақдимотда Самарқандда янгидан барпо этилаётган Имом Бухорий мажмуасининг ички ва ташқи кўринишига оид чизмалар кўриб чиқилди. Лойиҳага кўра, мажмуа деворлари миллий нақшлар, пардозбоп тошлар билан сайқалланади. Унинг деворларига қадимий услубда Қуръони карим суралари ва ҳадислар ёзилади.
Урганч шаҳрида қурилиши режалаштирилган Ал-Хоразмий шаҳарчасининг лойиҳаси тақдимот қилинди. Унга кўра, шаҳарчада университет, мактаб ва боғча, IT парк, фан ва маданият марказлари, спорт мажмуаси барпо этилади. Марказда алломанинг ҳайкали ўрнатилади.
Шунингдек, Урганч шаҳридаги Жалолиддин Мангуберди мажмуаси ёнида минг ўринли санъат саройи бунёд этиш ҳам мўлжалланган. У ерда Хоразм лазгиси анъаналарини сақлаш, ўрганиш ва кенг ёйиш учун замонавий шароит яратилади.
Тақдимотда Ўзбекистон Республикаси Қуролли Кучлари Ҳарбий тиббиёт академияси учун янги ўқув ва даволаш бинолари, ётоқхона, хизмат уйи қуриш, мавжуд объектларни таъмирлаш ва ҳудудни ободонлаштиришга оид лойиҳалар ҳақида ахборот берилди.
Бундан ташқари, Тошкент вилоятида ва пойтахтда амалга ошириладиган қурилиш лойиҳалари ҳақида маълумот берилди.
Жумладан, Тошкент шаҳрининг Яшнобод туманида Олимпия шаҳарчаси қурилиши режалаштирилган. 160 гектарни эгаллайдиган мазкур шаҳарчада универсал стадион, очиқ ва ёпиқ спорт мажмуалари, ётоқхона, меҳмонхона, Чирчиқ дарёсида эшкак эшиш ҳавзаси барпо этилади.
Тошкент вилоятининг Бўстонлиқ туманидаги “Чорвоқ” туристик-рекреацион зонасида Чорвоқ сув омбори ва Чирчиқ дарёси бўйида экотуризм объектлари барпо этилади.
Президент лойиҳаларни такомиллаштириш ва сифатли қуриш юзасидан кўрсатмалар берди.
