Сўнгги беш йилда илк бор 6,5 млн аҳоли тоза ичимлик суви билан таъминланди – Шавкат Мирзиёев
Айни пайтда Президент ҳузурида йиғилиш бўлиб ўтмоқда.
Президент Шавкат Мирзиёев ҳузурида ҳудудларда ичимлик суви таъминотини яхшилаш масалалари юзасидан йиғилиш бошланади.
Йиғилиш аввалида давлат раҳбари сўнгги беш йил ичида аҳоли сув таъминотини яхшилаш борасида олдинги йилларга нисбатан 5 баравар кўп, яъни 10 трлн сўм пул маблағлари ажратилганини ҳамда илк бор 6,5 миллион аҳоли тоза ичимлик суви билан таъминланганини айтиб ўтди.
Шунингдек, 2021 йилда 6300 километрга яқин ичимлик ва оқова сув тармоқлари тортилгани, 474 та сув иншоотлари қурилгани, 592 та маҳаллада 2,5 миллион аҳолининг сув таъминоти яхшилангани таъкидланди.
"Энг муҳими, бу ишлар ҳисобига 1,5 миллион аҳоли илк бор ичимлик суви билан таъминланди. Шу билан бирга, ҳали соҳада ечимини кутаётган муаммолар кўп", деди Президент.
Мисол учун, 4 мингта маҳаллада ичимлик суви суткасига 4-6 соат берилади. 1,5 мингдан ортиқ маҳаллада марказлашган таъминот йўлга қўйилмаган.
Бундан ташқари, 2 мингга яқин боғча, мактаб ва тиббиёт муассасалари марказий тармоққа уланмагани боис, сувни ташиб келишга мажбур бўлмоқда.
Қашқадарё, Сурхондарё ва Жиззахда ичимлик суви таъминоти 60 фоиздан кам.
