Тошкент вилоятида ота-бола “алкимёгар”лар қўлга олинди
Улар ноқонуний равишда олтин излаш билан шуғулланишган.
Тошкент вилоятининг Оққўрғон туманидаги "Шоҳрухия шаҳристони" моддий-маданий мерос объектида номаълум шахслар томонидан қазиш ишлари олиб борилаётгани аниқланди. Бу ҳақда Маданий мерос агентлиги маълум қилди.
Хабарда айтилишича, ушбу шахслар махсус металл қидирув мосламаси ёрдамида маданий мерос объектидан 3 дона темир металл буюми олаётганда қўлга олинган.
"Маданий мерос объектларини муҳофаза қилиш ва улардан фойдаланиш тўғрисида"ги Қонуннинг 10-моддасига кўра, моддий маданий мерос объектлари жойлашган ерларда ҳамда уларда туташ ҳудудларда ер қазиш, қурилиш, мелиорация, хўжалик ишлари ва бошқа ишлар, шунингдек, моддий-маданий мерос объектларида илмий ва илмий-техник тадқиқотлар махсус рухсатнома олингандан сўнг амалга оширилади.
Айни дамда қонунбузарларниниг шахсига аниқлик киритилиб, вилоят прокуратураси томонидан текширув ишлари олиб борилмоқда.
