Кутилмаган тайинлов: Вазир вилоят ИИБга бошлиқ бўлди
Маҳалла ва оилани қўллаб-қувватлаш вазири Раҳмат Маматов Самарқанд вилояти ИИБ бошлиғи этиб тайинланди.
Бу ҳақда вилоят ҳокимлиги ахборот хизмати хабар берди.
Унга кўра, Шавкат Раҳмонов бошқа ишга ўтгани сабабли вилоят ИИБ бошлиғи лавозимидан озод этилган. Ички ишлар вазирининг буйруғи билан Раҳмат Маматов Самарқанд вилояти ички ишлар бошқармаси бошлиғи лавозимига тайинланган.
Маълумот учун: Маматов 1967 йилда Қашқадарё вилояти Қарши туманида туғилган. Маълумоти олий, ҳуқуқшунос, полковник ҳарбий унвонига эга. Маматов Қарши давлат педагогика институти ҳамда ИИВ академиясини тамомлаган.
У Фарғона вилояти ИИБ бошлиғи биринчи ўринбосари, Хоразм вилояти ИИБ бошлиғи, ички ишлар вазири ўринбосари, ички ишлар вазирининг биринчи ўринбосари, Навоий вилояти Халқ қабулхонаси мудири, Фарғона вилояти ИИБ бошлиғи, «Маҳалла» хайрия жамоат фонди раиси лавозимларида ишлаган.
У 2020 йил 18 февралдан бери маҳалла ва оилани қўллаб-қувватлаш вазири лавозимида ишлаб келаётган эди.
