Ўқитувчини хафа қилишга ҳеч кимнинг ҳаққи йўқ – Бахтиёр Саидов
Халқ таълими вазири ота-оналардан узр сўрашга мажбурланган ўқитувчилар билан учрашди.
Бахтиёр Саидов Марҳамат туманида ота-оналар олдида узр сўрашга мажбур қилинган ўқитувчилар билан учрашиш мақсадида Андижон вилоятига борди.
Хабар қилишича, вазир ўқитувчилар билан суҳбатлашиб, уларнинг руҳиятини кўтарган. Ўқитувчиларнинг обрўси ва қадр-қиммати Давлат сиёсати даражасидаги муҳим масала эканлиги ва уларни обрўсизлантиришга ҳеч ким ҳақли эмаслигини қайд этиб, юз берган ҳолатни устоз шаънини ерга уриш деб баҳолаган:
— Юртбошимиз Шавкат Мирзиёев ўқитувчиларни улуғлаш масаласини Давлат сиёсатининг энг юқори даражасига олиб чиқиб, ўқитувчи жамиятимизнинг энг ҳурматли инсони бўлиши эканлигини доимий равишда таъкидлаб келмоқда. Шундай экан , ўқитувчини хафа қилишга ҳеч кимнинг ҳаққи йўқ. Ўқитувчи қадрланмаган юртнинг эртаси бўлмайди. Шундай экан, бугун ҳар биримиз, ҳаттоки ўқитувчиларнинг ўзи ҳам шаъни ва обрўсини ошириш учун ҳаракат қилиши зарур, — деди Бахтиёр Саидов ўқитувчилар билан учрашув чоғида.
Учрашув сўнггида ўқитувчиларнинг фикрларини тинглаган вазир улар билан маслаҳатлашган ҳолда мазкур ҳолатга йўл қўйган мутасаддиларга албатта чора кўрилиши алоҳида қайд этди.
