Уч президент маслаҳатчиси: АҚШнинг душманлари шунчалик кўпки, у парчаланиб кетиши мумкин
АҚШ барча душманларини бир вақтнинг ўзида мағлуб қила олмайди.
Қўшма Штатлар сўнгги ўн йилликда шунчалик кўп сиёсий душман орттирдики, Америка нафақат ўз мавқеини, балки бирлигини ҳам йўқотиши мумкин, чунки у барча душманларини бир вақтда мағлуб қила олмайди.
Бу ҳақда америкалик сиёсатчи Патрик Бьюкенен American Conservative нашридаги мақоласида шундай ёзган.
Унинг фикрича, америкаликларнинг “ҳамма нарсаси бор эди”, аммо улар узоқ вақт давомида “бетакрор” держава бўлишга уринган ва “дунёда янги тартиб ўрнатиш мақсадида” турли мамлакатлардаги урушларга аралашган.
“Энди эса ўзимиз қон йўқотяпмиз. Ўз-ўзимизни қийнаб, парчаланишга қараб ҳаракатланмоқдамиз”, - дейди Оқ уйнинг собиқ маслаҳатчиси.
Бьюкенен шунингдек Америка “янги дунёвий тартиб ўрнатиш учун салиб юришларини давом эттираётган бир пайтда Россия совуқ урушнинг даҳшатли оқибатларини енггани ва Хитой АҚШ соясидан чиқишни бошлаган”ини ёзган.
Маълумот учун: Патрик Бьюкенен уч президент: Ричард Никсон, Жеральд Форд ва Рональд Рейганнинг бош маслаҳатчиси бўлган.
Эслатиб ўтамиз, аввалроқ АҚШ мудофаа вазирининг собиқ ёрдамчиси Элбриж Колби АҚШ Пекин билан урушга тайёр бўлиши керак, деган фикрни илгари сурганди.
Шарофат Маҳмудова
