Сарсон вазирлик
Туризм ва спорт вазирлиги яна иккига ажратилди.
Бугун, 18 февраль куни Олий Мажлис Қонунчилик палатасининг навбатдаги мажлиси бўлиб ўтди. Унда депутатлар Ўзбекистон Республикаси бош вазирининг ўринбосари — туризм ва маданий мерос вазири лавозимига Азиз Абдуҳакимов номзоди кўриб чиқилди. Якуний хулосага кўра, ушбу лавозимга унинг номзоди маъқулланди.
Шунингдек, мажлисда, спортни ривожлантириш вазири лавозимига Адҳам Икромов номзоди ҳам кўриб чиқилиб, маъқулланди.
Эслатиб ўтамиз, Адҳам Икромов айни пайтда Савдо-саноат палатаси раиси лавозимида ҳам фаолият юритмоқда.
2021 йил апрель ойида Жисмоний тарбия ва спорт вазирлиги ҳамда Туризмни ривожлантириш давлат қўмитаси бирлаштирилиб, Туризм ва спорт вазирлиги тузилган, вазир лавозимига Азиз Абдуҳакимов тайинланганди.
Эндиликда мазкур вазирлик негизида Туризм ва маданий мерос вазирлиги ҳамда Спортни ривожлантириш вазирлиги тузилмоқда. Бу ўзгариш ҳақида бугунга қадар жамоатчиликка маълум қилинмаган.
2021 йилга қадар Маданият вазирлиги ҳузуридаги Маданий мерос департаменти сифатида фаолият юритган тузилма ўтган йили янги тузилган вазирлик тизимига ўтказилиб, Маданий мерос агентлиги сифатида қайта ташкил этилганди.
