Бизни қўллаб-қуватлагани учун Британиядан миннатдорман – Владимир Зеленский

 

Украина президенти Владимир Зеленский Мюнхенда Буюк Британия Бош вазири Борис Жонсон билан учрашди.

 

"Биз Россия Федерациясининг агрессив ҳаракатлари фонида хавфсизликни таъминлаш ҳақида гаплашдик. Кейинги қўшма қадамлар ҳақида келишиб олдик. Дипломатия орқали вазиятни юмшатиш йўлида ҳамжиҳатликни сақлаб қоламиз. Буюк Британиядан миннатдорман. Украинани қўллаб-қувватлагани, хавфсизлик ва тинчлик йўлидаги ҳамкорлик учун”, — деб ёзди Зеленский Твиттерда. 

Бундан олдин у хавфсизлик ташрифи мақсадини эълон қилган эди.

 

"Германияга етиб келдим. Бугун Мюнхен хавфсизлик конференцияси, ҳамкорларимиз ва дўстларимиз билан музокаралар. Асосий масалалар - Украина чегараларидаги таҳдидлар", деб ёзди у Инстаграмда.

 

Президентнинг қўшимча қилишича, Украина хавфсизлик ва мудофаа кучлари “вазиятни тўлиқ назорат қилади”, провокацияларга муносабат билдирмайди, шунингдек, Донбассда фақат тинчлик ўрнатишга интилади.

 

"Агар Россия қўшни давлатга бостириб кирса, биз жисмоний шахслар ва Россия учун стратегик аҳамиятга эга корхоналарга нисбатан санкциялар қўямиз. Уларнинг Лондон капитал бозорларидан маблағ олишини имконсиз қиламиз",  дейди нутқи давомида Жонсон.

 

У Буюк Британия ва унинг иттифоқчилари ҳарбий салоҳиятини кучайтириб, Польшадаги НАТО кучлари таркибида ҳозирданоқ ўз иштирокини ошириб бўлишганига ишонтирди.

 

Эслатиб ўтамиз, Зеленский Мюнхенда Германия канслери Олаф Шольц, АҚШ вице-президенти Камалла Харрис, халқаро молия институтлари вакиллари ва Украинанинг бошқа ҳамкорлари билан ҳам учрашади.