Комил Алламжонов Ортиқхўжаевнинг камчилигини айтди
Шунингдек, у ҳоким билан ўрталаридаги муносабатга яна бир бор тўхталиб ўтган.
Бугун Инстаграм саҳифасида Тошкент шаҳар ҳокими Жаҳонгир Ортиқхўжаевнинг жамоатчиликка мурожаати баён қилинган очиқ хат эълон қилинди. Унда Ортиқхўжаев Миллий масс-медиани қўллаб-қувватлаш ва ривожлантириш жамоатчилик кенгаши раиси Комил Алламжонов билан ўрталарида ҳеч қандай совуқчилик йўқлигини айтиб ўтган. Шунингдек, ҳоким ижтимоий тарқмоқларда айтилаётган турли хил гапларга ишонмасликка чақирган.
Комил Алламжонов ҳам бу мурожаатга ўз муносабатини билдириб, ҳоким билан 8 йилдан бери таниш эканликларини маълум қилган. Шунингдек, у ҳокимнинг атрофида бўлаётган тушунмовчиликлар сабабини айтган.
“Тан олиб айтаманки, ҳоким тадбиркорликни, катта лойиҳаларни, қурилишларни яхши эплайди ва анча ишлар қиляпти. Лекин битта муаммо кўпинча унга халақит беради. Бу ҳам бўлса — унинг гапга йўқлиги. Шу туфайли ҳам кўплаб тушунмовчиликлар юзага келади. Асосийси иш кетяпти” , – деган Алламжонов.
