Тюлень океанга тушиб кетган одамга ёрдам берди
"Энди мен қандайдир олий куч борлигига ишонаман, аммо буни тушунтириб беролмайман", деган сувдан омон чиққан Скотт.
Денгиз типратиканларини йиғиш билан шуғулланувчи калифорниялик Скотт Томпсон тунда қайиқдан океанга тушиб кетди.
Мотор ёниқ бўлгани учун қайиқ бошқа йўналишда ҳаракатини давом эттирган ва Скоттдан узоқлашиб кетган. Бу пайтда Томпсон сувда узоқ вақт қола олмаслигини тушунган эди.
"Мен ўша пайтда бугун ўлсам керак деб ўйладим", - дейди Томпсон KABS-TV'га берган интервьюсида.
Аммо унга кутилмаган жойдан ёрдам келди - Скоттнинг ёнида тюлень пайдо бўлди. Жонивор уни 1-2 марта итариб, сузишга ундаган. Шундан сўнг Томпсон нефть платформасига қараб сузди.
5 соат давомида тюлень Скоттга ҳамроҳлик қилди, у эса жониворга қўшиқлар ва латифалар айтиб сузаверди. Улар платформага етиб келганида қуёш чиққан эди. Ишчилар Скотни зудлик билан сувдан олиб чиқиб, шифохонага юборишди.
