Энди ички мусобақаларда Хоразм жамоаси кучли назорат қилинади
Бугун хоразмлик оғир атлетикачида тақиқланган модда борлиги аниқланди.
Яқин йиллар ичида ўзбекистонлик спортчилар орасида допинг ҳолатлари тез-тез аниқланмоқда. Миллий антидопинг агентлиги томонидан ўтган 9 ой давомида барча спорт турлари бўйича ўзбекистонлик спортчилардан 312 та допинг-синамалар олинди ва 4 та спортчи тақиқланган модда истеъмол қилганлиги аниқланган.
Бугун ҳам Ўзбекистон Миллий антидопинг агентлиги ҳузуридаги Ахлоқ комиссиясининг қарорига кўра, оғир атлетикачимиз Мафтуна Исмолиовада 2021 йил ноябрь ойида мусобақадан ташқари даврда олинган допинг-синамасидан тақиқланган “OXANDROLONE” ва “STANOZOLOL” моддалари борлиги маълум бўлди.
Мазкур ҳолат бўйича Ўзбекистон оғир атлетика федерацияси мабуот хизмати раҳбари Омонжон Тўхтамирзаев қуйидагиларни Zamon.uz'га маълум қилди.
“Бу ҳолат бўйича Федерация вице-президенти Шахрилло Махмудов ҳам алоҳида таъкидлаб ўтган. Бутун республика бўйлаб, чекка-чекка қишлоқлардаги спортчиларда допинг бўйича ҳолатлар ҳеч кимга фойда келтирмаслиги ҳамда терма жамоага жалб қилинган атлетлар тўлиқ назоратда бўлишини, агарда спортчида допинг аниқланса, бу ўзбек оғир атлетикасига салбий таъсир қилиши, иш ҳаттоки Олимпиада лицензияси камайтирилишигача бориши мумкинлигини айтиб огоҳлантирган”.
Омонжон Тўхтамирзаев Мафтуна Исмоиловада аниқланган допинг бўйича қуйидагиларни айтиб ўтди.
“Мафтуна бўйича унақа қизиқ гап ҳам йўқ. У Республика чемпионатида Хоразм номидан қатнашган, терма жамоа аъзоси эмас. Шу сабабли унинг допинг тестида тақиқланган моддалар топилгани терма жамоага таъсир қилмайди. Вилоятларда баъзи мураббийлар шогирди республика ва бошқа мусобақаларда натижа қайд этишидан (моддий жиҳатдан ҳам) манфаатдор. Шунинг учун баьзилар мақсадга бошқа йўлдан боришади. Энди ички миқёсда Хоразм жамоаси вакилларини аввалгидан ҳам кучлироқ назорат қилинади. Қолганларга оммавий жазо бўлмайди”.
Шу тариқа антидопинг агентлигининг маълумотига кўра Мафтуна Исмоилова Бутунжаҳон антидопинг кодексининг 2.1-моддасида кўзда тутилган антидопинг қоидабузарлиги учун 2021 йил 23 декабрдан бошлаб, 2025 йил 22 декабрга қадар 4 йил муддатга дисквалификация қилинди.
