Австралия Украинадаги элчихонасини Польшага кўчирмоқчи
Айни пайтда Исроил ҳам элчихонани кўчиришга тайёрланмоқда.
Австралия Украинадаги дипломатларини Польшага кўчирмоқчи. Бу ҳақда ABC ахборот канали манбаларига таяниб хабар берди.
Хабар қилинишича, айни пайтда Украина ҳудудида Австралия ТИВнинг 3 ходими бор. Улар Львовга дипломатик миссия билан юборилган. Яқин кунларда улар мамлакатдан чиқиб, Австралия нинг Варшавадаги элчихонасида ишини давом эттириши кутилмоқда.
Маълумот учун: АҚШ ҳам Украинадаги элчихонаси дипломатларини Польшага кўчирмоқчи эканини билдирган эди.
14 февраль куни Вашингтон АҚШ элчихонаси Львовга кўчирилишини эълон қилган. Австралия, Канада, Буюк Британия ва Литва ҳам АҚШ изидан бориб, элчихонани Львовга кўчирган. Айни пайтда Исроил ҳам кўчишга тайёрланмоқда.
Эслатиб ўтамиз, аввалроқ АҚШ Президенти Жо Байден Россиянинг Украина шарқидаги ДХР ва ЛХР мустақиллигини тан олиши муносабати билан санкциялар тўғрисида қарор имзолагани ҳақида хабар берилганди.
Шарофат Маҳмудова
