Тошкент метросида яна поезд тўхтаб қолди
Иккита бекатда йўловчилар вагондан туширилган.
Бугун, 23 февраль куни метрополитеннинг Юнусобод йўналиши бўйлаб ҳаракатланаётган поезд “Абдулла Қодирий” бекатида тўхтаб қолгани акс этган видео тарқалди. Видео муаллифининг сўзларига кўра, тахминан 200 нафар йўловчи бекатга туширилган.
Шунингдек, худди шу йўналишнинг “Юнус Ражабий” бекатида ҳам поезд вагонлари 20-30 дақиқа тўхтаб қолгани акс этган видеолар тарқалди.
Ҳолат юзасидан расмий изоҳ берилишича, “Абдулла Қодирий” метро бекатида 65-сонли ҳаракат таркиби соат 13:55 да техник носозлик аниқлангани сабабли ушбу бекатда йўловчиларни туширган.
Шундан сўнг Юнус Ражабий бекатида ҳаракатланаётган 62-сонли поезд ҳам йўловчиларни бекатда қолдириб, 65-маршрутни депо томон ҳаракатлантирган. 14:10 дан бошлаб йўналишда поездлар қатнови тикланган.
