Роскомнадзор россияликларнинг Фейсбукка киришини чеклайди
Ижтимоий тармоқ "инсон ҳуқуқ ва эркинликларини бузиш"да айбланмоқда.
Роскомнадзор Россияда Фейсбукка киришни қисман чеклашга қарор қилди. Бунгача ижтимоий тармоқ маҳаллий ОАВ аккаунтларини чеклаган эди. Бу ҳақда Роскомнадзор матбуот хизмати хабар берди.
“24 февралm куни Фейсбук ижтимоий тармоғи Россиянинг тўртта оммавий ахборот воситалари: Звезда телеканали, РИА Новости ахборот агентлиги, Lenta.ru ва Gazeta.ru интернет сайтларининг расмий аккаунтларини чеклади”, — дейилади назорат органи баёнотида.
Роскомнадзор 2022 йил 25 февралдан бошлаб ижтимоий тармоққа киришни қисман чеклайди.
Аввалроқ Россия Google компаниясини қарийб 100 миллион доллар жаримага тортган эди. Москвада суд Америка корпорациясини Россия қонунчилигини қайта-қайта бузганликда айбдор деб топди.
Бунгача Россияда Твиттер секинлашган эди. Роскомнадзор Америка ижтимоий тармоғини Россия Федерацияси ҳудудида бутунлай блокировка қилиш билан таҳдид қилмоқда. Тахминларга кўра, 2017 йилдан бери Твиттер номақбул контентни ўчириш бўйича сўровларни эътиборсиз қолдириб келмоқда.
