Хитой Россиянинг Украинага ҳужумини босқин деб ҳисобламайди

 

Хитой ҳукумати Россиянинг Украинадаги ҳарбий амалиётини босқинчилик деб тан олмаслигини маълум қилди ва Кремлни танқид қилишдан тийилмоқда. Бу ҳақда Хитой Ташқи ишлар вазирлиги расмий вакили Ван Венбин изоҳига таяниб, Reuters хабар берди. 

 

Пекин барча мамлакатларнинг ҳудудий яхлитлигини ҳурмат қилишини тасдиқлади, бироқ Украина масаласини “қийин ва алоҳида тарихий асосга эга” деб ҳисоблайди.

 

25-феврал, жума куни бўлиб ўтган брифингда Венбин “Россиянинг қонуний хавфсизлик хавотирларини тушунамиз” деб айтган.

 

Шунингдек, Хитой томони Россия Федерациясига нисбатан санкциялар сиёсатини қўллаб-қувватламайди.

 

"Санкциялар ҳеч қачон муаммони ҳал қилишнинг самарали воситаси бўлмаган. Умид қиламизки, тегишли томонлар мулоқот ва маслаҳатлашувлар орқали муаммоларни ҳал қилиш учун ҳаракат қилишлари мумкин", - деди Хитой ТИВ вакили.

 

Аввалроқ Грузия Россияга қарши санкцияларга қўшилмаслиги маълум қилинганди. Бош вазир Ираклий Гарибошвилининг айтишича, бу Грузия миллий манфаатларига зиддир.

 

Эслатиб ўтамиз, дунёнинг  аксарият давлатлари Россиянинг ҳарбий тажовузини қоралади. Қўшма Штатлар ва Г7 давлатлари Кремлга қарши "тортишувчи санкциялар" бўйича келишиб олди.