Украинага ҳозир ёрдам беринг, эртага ёки бир соатдан кейин жуда кеч бўлади – Кличко
Бокс юлдузи Владимр Кличко жаҳон ҳамжамиятига видеомурожаат қилди.
Киев мери Виталий Кличконинг укаси, дунёга машҳур боксчи Владимир Кличко жаҳон ҳамжамиятига Россиянинг Украинага ҳужумини тўхтатишга чақирувчи видеомурожаат қилди.
У дунёни зудлик билан ҳаракат қилишга чақирди, акс ҳолда жуда кеч бўлиши мумкин.
"Мен Владимир Кличкоман. Ва бутун дунёга мурожаат қиламан: Россия бошлаган урушни тўхтатинг. Бугун Киевнинг тинч аҳолисига ракеталар отилди. Одамлар ҳалок бўлмоқда. Ва бу Европанинг қоқ марказида содир бўлмоқда. Ҳозир кутиш вақти эмас, бу фалокат”, деди спортчи.
Кличко зудлик билан чора кўриш кераклигини таъкидлаган.
"Россия агрессиясини тўхтатиш учун ҳозир ҳаракат қилишингиз керак. Қўлингизда бор нарса билан. Ва зудлик билан! Эртага ёки бир соатдан кейин жуда кеч бўлиши мумкин. Илтимос, зудлик билан ҳаракат қилинг! Кутманг! Ҳаракат қилинг! Бу урушни тўхтатинг!" - деган Кличко.
