АҚШ Хитой ҳудудий яхлитлигини ҳурмат қилмаяпти — Ван И
Хитой бош дипломати давлатлар тарихий танлов олдида турганини таъкидлади.
Вашингтоннинг “ягона Хитой” тамойилини ҳурмат қилмаслиги Хитой ва АҚШ муносабатларининг мураккаблашувига сабаб бўлди. Бу ҳақда ХХР ташқи ишлар вазири Ван И маълум қилди.
“Дипломатик муносабатлар ўрнатилганидан буён Хитой-АҚШ муносбатлари мисли кўрилмаган муаммоларга дуч келди. Бу ўз навбатида дунёнинг навбатдаги бўлиниши юзасидан халқаро ҳамжамиятда хавотир уйғотмоқда.
Ушбу вазиятнинг вужудга келишида асосий сабаб Шанхай Коммюникесида белгиланган тамойилларнинг ҳурмат қилинмаслиги ҳисобланади.
Хитой ва АҚШ яна тарихий танлов олдида турибди: бирга тинч-тотув яшаш ёки низо ва қарама-қаршиликка қараб кетиш, очиқлик ва ҳамкорликка риоя қилиш ёки яккаланиш ҳамда антагонизмга қайтиш”, – деган дипломат.
Унинг сўзларига кўра, юқорида тилга олинган коммюникедаги энг муҳим нуқта Тайвань масаласи саналади. Унда вашингтон “ягона Хитой” мавжудлигини тан олган.
Маълумот ўрнида: Шанхай коммюникеси – Хитой ва АҚШ томонидан 1972 йилда имзоланган ҳужжат. У Вашингтон ва Пекин ўртасидаги муносабатлар яхшиланишига асос бўлди. Бу йил унинг имзоланганига 50 йил тўлди.
Эслатиб ўтамиз, аввалроқ Ван И Америка билан очиқ қарама-қаршилик шаклланиши мумкинлигини маълум қилганди.
