46 яшар Оксана Чусовитина яна бир олтин медални қўлга киритди
Ўзбекистонлик гимнастикачи Дохада ўтаётган Жаҳон кубогининг финал босқичида олтин медални қўлга киритди.
Қатар пойтахти Доҳа шаҳрида спорт гимнастикаси бўйича Жаҳон кубоги бўлиб ўтмоқда. Мазкур мусобақада Оксана Чусовитина етакчилигидаги бир гуруҳ ўзбекистонлик спортчилар ҳам қатнашмоқда.
Жаҳон кубогининг таяниб сакраш машқлари финал баҳсларида 46 ёшли Оксана Чусовитина энг яхши натижа қайд этди ва якунда олтин медалга сазовор бўлди. Унинг якуний кўрсаткичи 13.433 баллни ташкил қилди.
Маълумот учун, Оксана Чусовитина 1992, 1996, 2000, 2004, 2008, 2012, 2016 ва 2021 йилларда ўтказилган ёзги Олимпия ўйинларида иштирок этган. У 1992 йили жамоавий баҳсда Олимпия чемпиони, уч карра жаҳон чемпиони, Европа чемпиони, Осиё ўйинлари чемпиони бўлган.
Эслатиб ўтамиз, Оксана Чусовитина Токио Олимпиадасидаги иштирокидан сўнг спортдан кетганини эълон қилганди. 2021 йилнинг октябрь ойига келиб, у яна спортдаги карьерасини давом эттирмоқчилигини билдирди.
