Европада НАТОнинг 140 минг аскари бор — Йенс Столтенберг
Шунингдек, альянснинг 24 мартдаги саммитидан кўзланган мақсад очиқланди.
Йенс Столтенгберг 24 март куни бўлиб ўтадиган НАТО фавқулодда саммитидан кўзланган мақсадни очиқлади.
Бу ҳақда “ТАСС” хабар берди.
Унинг сўзларига кўра, Европадаги геосиёсий вазият ва Россияни тийиб туриш саммитнинг асосий вазифаси саналади. Бугун Брюсселда бўлиб ўтган альянсга аъзо давлатлар мудофаа вазирлари учрашувида қуруқлик, ҳаво, денгиз, космос ва кибермаконда коллектив мудофаани кучайтириш чораларини ишлаб чиқиш масаласини кўриб чиқиш топширилган.
Столтенбергнинг сўзларига кўра, НАТО мамлакатлари ўз хавфсизлиги учун янги реалликка дуч келди. Шунинг учун “коллектив мудофаа тизимини қайта йўлга қўйиш ҳамда узоқроқ муддатга тийиб туриш сиёсатини қайта кўриб чиқиш лозим”.
Альянс бош котибининг таъкидлашича, янги хавфсизлик стратегияси НАТО шарқий қанотида қуруқликда кўпроқ қўшин жойлаштиришни назарда тутади. Бундан ташқари, ҳавода кўпроқ самолётлар пайдо бўлиши, Ҳаво ҳужумига ва ракетага қарши тизимлар жойлаштирилиши зарур. Денгизда эса доимий аснода авиаташувчиларнинг зарбдор гуруҳлари, сувости ва жанговор кемаларни жойлаштириш режалаштирилган.
“Тийиб турувчи кучлар ва қуролларнинг кўпайтирилиши ўз навбатида ҳарбий харажатларнинг ҳам ошишини билдиради. Альянс давлатлари энг камида ЯИМнинг фоизини мудофаага ажратиши керак”, – деган Столтенберг.
Шунингдек, ҳозирда Европада НАТОнинг 140 минг аскари борлиги маълум қилинган. Улардан 100 минги АҚШ қўшинлари, қолган 40 минг аскар бевосита НАТО қўмондонлиги остида. Улар асосан альянснинг шарқий қанотига жойлаштирилган.
Аввалроқ АҚШ Арктикадаги ҳарбий иштирокини кучайтирмоқчи эканлиги тўғрисида хабар берилганди.
