18 март куни Тошкент шаҳрида юз берган ёнғин 7 соат ўтиб бартараф этилган
ФВВ Яшнобод туманидаги мой омборида юзага келган ёнғин сабабларини маълум қилди.
ФВВнинг маълум қилишича, Яшнобод туманидаги “ORIENT LOGISTIK СENTER” МЧЖга қарашли омборхонада юз берган ёнғин мурракаблиги, давомийлиги ва майдони нуқтаи назаридан ўта жиддий ёнғин сифатида баҳоланмоқда.
Уни бартараф этиш учун йигирмадан зиёд ёнғин-қутқарув автотехникаси, бир дона ёнғин-қутқарув поезди ва 6 дона сув ташиш автотехникалари жалб этилган.
Ёнғин 18 март куни тахминан соат 20.00 ларда бошланган бўлса, орадан салкам етти соат ўтиб бартараф этилган.
Таҳлилларга кўра, ёнғин омборхонада сақланмаслиги лозим бўлган юк кўтарувчи механизациялаштирилган транспортнинг электр тизимида авариявий ҳолат сабаб юзага келган деб таҳмин қилинмоқда. Унинг катта майдонга тарқалишига эса ушбу омборхонада аралаш ҳолда кўп миқдорда канцелярия маҳсулотлари, гул қоғозлар, полиэтилен ўрам маҳсулотлари, қуруқ эфир моддаси ва меъёридан ортиқ ёнувчи мотор мойи сақланганлиги сабаб бўлган.
Ёнғинни келиб чиқиш сабаблари, асосан, ташкилот мутасадилари томонидан объектда ҳар кунлик ёнғин хавсизлиги режимини назорат қилинмаганлиги билан боғлиқ бўлган.
