Жонсон Россия олтин захираларига чекловни кучайтиришни таклиф қилди
Шунингдек, у Зеленский билан учрашмоқчи.
Ғарб Россияга иқтисодий босимни кучайтириши керак. Бу ҳақда Буюк Британия бош вазири Борис Жонсон маълум қилди.
“Кўпроқ ишлашимиз керак. Айниқса, иқтисодий соҳада. Масалан, биз унинг (Владимир Путин) нафақат валюта, балки олтин захираларидан фойдаланишни янада чеклаб қўйишимиз мумкин. Бундан ташқари, SWIFT тизимига алоқадор санкцияларни кучайтириш учун яна нима қила оламиз? Украинага ҳарбий ёрдамни кўпайтиришимиз лозим”, — деган Жонсон LBC радиостанциясига берган интервьюсида.
Унинг фикрича, қанчалик кучли босим ўтказилса, урушнинг шунчалик тез якунлашишига эришилади.
Аввалроқ АҚШ Россия депутатларига қарши янги санкция жорий этиши тўғрисида хабар берилганди.
