Милиционер, шифокор ва тадбиркор: Ўзбекистоннинг баланд бўйли бўйдорлари

 

ИИО ходими Шерзод Сирожиддинов болалигидан бокс билан шуғулланган. Унинг иш топишида ҳам бўйининг узунлиги ёрдам берган. 

 

Узун бўйли бу йигит ўша пайтлари Фарғона вилояти ички ишлар бошқармаси бошлиғи лавозимида ишлаган Президент давлат маслаҳатчиси Турсунхон Худайбергеновнинг эътиборини тортади. Шундан сўнг у органга ишга қабул қилинади.

 

Аммо бўйи жуфтини топишда бироз қийинчилик туғдирган. Ота-онаси ўғлига мос келин қидириб, нақд бир йилдан ортиқ совчиликда юрган. Излай-излай охири Шерзод Сирожиддинов бахтини Марғилондан топади. Унинг турмуш ўртоғи Раҳима Сирожиддинованинг бўйи 1 метр-у 86 сантиметр. 

“Бўйимнинг узунлиги кўпинча яхшилликка хизмат қилади. Уй ишларида қўл етмас жойларни артишда, айниқса. Халақит қилган кезлари ҳам бўлади. Масалан, эшикдан кирётганимда ёки машинага ўтираётганимда ноқулайлик туғдиради. Ҳаттоки, бозордан ўзимга лойиқ уст-бош ва оёқ кийим тополмайман. Ҳаммасини тиктираман” , — дейди қаҳрамонимиз. 

 

Шерзод Сирожиддинов ҳозирда Фарғона вилояти ички ишлар бошқармаси патрул пост хизмати биринчи батальони 3-отрядида сафдор ходим. Ҳуқуқбузарлар билан курашишда ҳам унга бўйи ёрдам беради. Улар қочадиган бўлса, Шерзод тезда ушлайди.

Яна бир бўйдор йигитни Республика ихтисослаштирилган онкология ва радиология илмий-амалий тиббиёт марказининг болалар бўлимида учратиш мумкин. Қаҳрамонимиз бу ерда кичик илмий ходим бўлиб ишлайди. 

 

Пискентлик Отабек Тўйчиев 30 ёшда. Унинг бўйи 2 метр-у 5 cm.

 

Отабекка бўйи ҳаётдаги жуфтини топишда халақит бермаган. Аммо у ҳам Шерзод каби уст-бош ва оёқ кийим топишда қийналади. Иш столида ҳам узунлиги бироз ноқулайлик туғдиради.

 

"Абу-Сахий" бозоридаги дўконларнинг бирида бўйи 2 метр-у 5 cm бўлган тадбиркор (сотувчи) йигитни учратишингиз мумкин. Иш фаолиятида унинг бўйи ҳар доим яхшигина қўл келган. Ўзини сир тутишни хоҳлаган бу қаҳрамонимиз харидорларга юқоридаги буюмларни ҳеч бир ёрдамсиз бемалол олиб беролади.