Шавкат Мирзиёев БАА энергетика вазирини қабул қилди
Учрашувда савдо, инвестиция ва қишлоқ хўжалиги масалалари муҳокама қилинган.
Бугун, 24 март куни Ўзбекистон Республикаси Президенти Шавкат Мирзиёев Тошкент халқаро инвестиция форуми доирасида Бирлашган Араб Амирликлари энергетика ва инфратузилма вазири Сухайл ал-Мазруий бошчилигидаги делегацияни қабул қилди. Бу ҳақда Президент матбуот хизмати хабар берди.
Маълум қилинишича, юқори даражадаги меҳмон БАА Президенти Шайх Халифа ол-Наҳаён, Абу-Даби амирлиги Валиаҳд шаҳзодаси, БАА Қуролли Кучлар Олий Бош қўмондони ўринбосари Шайх Муҳаммад ол-Наҳаён ва мамлакат Бош вазири, Дубай Амири Муҳаммад ол-Наҳаённинг саломи ва энг эзгу тилакларини етказган.
Вазир хорижий бизнеснинг мамлакатимизга бўлган катта қизиқишини яна бир бор тасдиқлаган Тошкент форумининг муваффақиятли ўтказилгани билан табриклаган.
Учрашувда амалий ҳамкорликни, энг аввало, савдо, инвестициялар, инновациялар, қишлоқ хўжалиги, инфратузилма, логистика ва транспорт соҳаларида олий даражада эришилган келишувларга мувофиқ кенгайтириш истиқболлари муҳокама қилинган. “Яшил” энергетика соҳасидаги ҳамкорлик натижилари юқори баҳоланган.
Таъкидланишича, “Masdar” компанияси мамлакатимиз ҳудудларида фотоэлектрик ва шамол электр станцияларини қуриш бўйича қатор йирик лойиҳаларни амалга оширмоқда.
Инвестицион ҳамкорликни кенгайтириш ва устувор тармоқларда янги истиқболли лойиҳаларни амалга ошириш учун катта салоҳият мавжудлиги қайд этилган.
